A Banda Municipal de Ribadeo ofreceu un repertorio de música pop e rock no concerto churrascada organizado pola asociación Amadores da Música que se celebrou na tarde-noite deste pasado sábado no auditorio ao aire libre de Cabanela.
A Banda ribadense, dirixida por David Ballester, interpretou as pezas Pops in the spots; Smoke on the water, de Deep Purple; Abba Gold; Born to be wild, de Mars Bonfire; Queen in concert; The final countdown, de Joey Tempest; Livin´on a prayer, de Jon Bon Jovi; e Highway to hell, de AC/DC.
Da presentación do evento encargáronse o concelleiro de Cultura ribadense, Farruco Graña, e o presidente de Amadores da Música, Chema Suárez. E no concerto foron dadas a coñecer ao público as incorporacións de 4 novas músicas na Banda, que xa debutaran coa formación na actuación que ofreceu o día de San Roque. Son Carmen Cortés, Candela Aiqum García e Lia Ji Rodríguez e a clarinetista Carmen Ramos.
